Community Outreach Program gipasiugdahan sa MCPO

CEBU, Philippines —  Mokabat sa 400 ka mga bata ug hamtong ang naka benepisyo sa Mandaue City Police Office Community Outreach Program ug Serbisyo Caravan nga gipahigayon sa Cebu International Convention Center.

Ang mga serbisyo nga napahimuslan sa katawhan mao ang libre nga tupi, medical check-ups, pag-apod-apod ug mga seedling, food packs ug uban pa.

Ang maong kalihukan gipangulohan ni Police Colonel Jeffrey Caballes ang City Director sa MCPO uban sa mga ginsakopan niini ug mga stakeholders. Ang CICC usa sa duha ka mga dapit diin adto himoon ang caravan of services sa kapolisan ug mga partners niini nga mipaambit sa serbisyo.

Gawas sa caravan of services, gilingaw usab ang katawhan pinaagi sa pagpakita sa talent sa mga sakop sa kapolisan.

Gipasalamatan usab ni Caballes, ang ilang mga partners sa pagpaambit sa maong caravan of services para sa katawhan nga mas labing nanginahanglan.

Gihangop ug gipasalamatan usab sa mga Mandauehanon ang kapolisan gumikan sa ilang gidalit nga libre nga serbisyo. MEL (BANATNEWS)