CEBU, Philippines — Dul-an P2 milyones ang danyos nga gibilin sa sunog nga niulbo sa Sitio Lower Tac-an, Barangay Budlaan ning Dakbayan sa Sugbo alas-4 sa kadlawon adlaw nga Domingo.
Ang sunog naglambigit mga kabalayan nga giingong nagsugod sa panimalay ni Alberto Del Mar nga gipuy-an ni Gina Del Mar ug mga kaubanan. Ang sunog giisa lang sa 1st alarm ug hingpit nga napawong alas 4:24 sa kaadlawon. Walay gikataho nga nakalas o naangol sa maong sunog nga nidanyos og P1.8 milyon. Usa ka balay ang hingpit nga naugdaw ug usa ang nakan-an sa maong sunog.
Matud pa ni Fire Officer 3 Fulbert Navarro, Fire Investigator sa Cebu City Fire, padayon pa ang ilang gihimo nga imbestigasyon sa sunog nga niulbo lakip na ang pag-imbitar sa mga saksi ug mga nagpuyo sa maong dapit. (BANAT NEWS)