Bag-ong traffic light sa Minglanilla gisaway sa netizens

CEBU, Philippines — Gipangmontar na sa kagamhanan sa Lungsod sa Minglanilla ang mga bag-ong traffic light diha sa kadalanan.

Adunay nakauyon apan wala usab kini makalikay sa mga pagsaway gikan sa netizens.

Usa na niini si Paraiso Cabelin Brian Dave nga nihulagway nga ang traffic light mao ang nagdala sa trapik sa lungsod.

Apan si Mayor Rajiv Enad nipasabot nga ikatulong adlaw pa sila nga nagpahigayon sa ilang testing sa traffic light.

Gipadayag ni Enad nga maayo ra ang dagan sa ilang pag-testing apan sa Barangay Tungkop nga habig adunay nakita nga kinahanglang usbon ang pattern aron mosigo sa kahimtang sa trapiko.

Matud ni Enada nga padayon sila nga nagtuon sa mga kausaban sa traffic lights nga mohaom sa gidaghanon sa mga sakyanan.

Nangayo og pasensiya si Enad ug nihangyo kini sa pagsabot kay dili diha-diha dayon nga maperpekto ang ilang gipatuman nga pagpalambo sa dagan sa trapiko sa lungsod.

Sa laing bahin, hingpit nga mopatuman og speed limit ang buhatan  sa Traffic Enforcement Agency of Mandaue (TEAM) kong maaprobahan na ang ordinansahon  nga Speed Limit and Anti-Bora-Bora sa siyudad.

Si Hyll Retuya, TEAM legal ug admin head nagkanayon nga magbaton na unya ang siyudad og speed guns and noise-controlling devices sa higayon nga maabot na ang nahisgutang mga kahimanan nga gipamalit. — Romeo T.  Limpangog/BDB (BANAT NEWS)