CEBU, Philippines — Buksan sa Visayan Electric Company ang Aboitiz Power Distribution Group Engineering Scholarship Program alang sa Academic Year 2023-2024. Pinaagi sa ilang Facebook page ang Visayan Electric Co. miawhag sa mga estudyanti sa electrical engineering nga mosalmot sa maong programa nga inabagan sa Aboitiz Group’s Great Transformation kun GT2025.
Ang Aboitiz Power Distribution Utilities Engineering Scholarship Program mobukas pagbalik og usa ka oportunidad sa umaabot nga Electrical Engineers nga mamahimong moabag sa pagpalambo ug pagpangulo sa negosyo.
Sa gustong mosalmot sa maong programa mamahimong mo fill-out ug mo apply pinaagi sa link nga https://ow.ly/30z150PcuFK, kalakip niini mao ang kopya sa final grades sa pagka Grade 11 ug 12.
Kinahanglan usab ang study load o bisan unsa nga certificate gikan sa unibersidad nga nagpamatuod nga ang aplikante bonafide nga 1st year college sa usa ka Bachelor of Science in Electrical Engineering.
Ang maong programa maghatag og full coverage sa basic tuition fee, miscellaneous fee, summer classes fees, monthly allowance, brandew nga laptop, project allowance per semester, graduation fees ug yearbook fees.
Gipahibawo usab nga ang deadline sa pagsumitar sa application form kutob lamang sa Agosto 18, 2023. Sa kadtong anaay mga pangutana o mga gustong e klaro nga impormasyon mamahimo usab nga mopadala og mensahe sa ilang email account sa apdu.hr.tst@aboitiz.com. (BANAT NEWS)