CEBU, Philippines — Nakuha sa mga Sugbuanong miyembro sa sikat nga Lumad Basakanon ang ikaduhang pwesto samtang nakoronahan isip Aliwan Festival Queen ang Cebuana nga si Kiara Liane Wellington atol sa Aliwan Fiesta 2023 Festival nga gihimo sa CCP Complex sa Pasay City.
Ang Lumad Basakanon, ang representar sa Sinulog Festival mao say nakakuha sa first runner-up trophy sa street dancing competition samtang nakuha sa makadaghan na sab nag-kampeyon nga sikat sab nga Tribu Parianon sa Dinagyang Festival sa Iloilo.
Ang Manggahan Festival sa Guimaras Province maoy nadeklarar sa ikatulong pwesto, ang Halamanan Festival sa Guiginto Bulacan ikaupat, ang Kadalag-an Festival sa Negros Occidental maoy sa ikalima.
Apan bisan wala makuha sa Luma Basakanon ang street dancing category, sila maoy nakakuha sa "Best in Musical Accompaniment" award.
Ang Halamanan Festival sa Guiginto, Bulacan maoy nakakuha sa "Best Float" award, ang Baguio Panagbenga Flower Festival maoy "Best Folkloric Performance" award samtang ang Manggahan Festival maoy napili para sa "Best in Costume" award.
Sa pikas bahin, si Wellington naapil na karon sa gitawag nga mga Cebuanang nakoronahan isip "Reyna ng Aliwan" human iyang nalupigan ang laing 18 ka mga rayna sa nagkalain-laing festivals nga nisalmot didto.
Gawas sa korona, ang 21 anyos nga si Wellington mao sab ang nakakuha sa "Best in Evening Gown" award.
Ang laing mga kandidato nga nakadawat og pasidungog mao silang Kristine Billy Tabaday sa Ayat Festival, Natalya Margaret Linsday sa Tagultol Fishing Festival, Ghenesa Marie Mueller sa Uyakan Festival, ug Patricia
Mae Mendiola sa Pasayahan Festival.
Apil sab sa gihatagan og awards silang Erika Maie Sawma sa Antipolo Maytime Festival ug Melanie Grace Gillamac sa Palawod Festival.
Sa pagtapos sa Aliwan Fiesta 2023, ang Cebu City government miimbitar sa mga nisalmot nga festivals gikan sa nagkalainlaing LGUs nga mosalmot sab sa umaabot nga Sinulog Festival 2024.
Sila si South District Congressman Edu Rama ug City Councilor Joel Garganera nga mitambong sa event nagpasalamat sa mga Cebuano performers sa ilang nabuhat para sa dakbayan. — /IBM (BANAT NEWS)