CEBU, Philippines — Gibutyag ni Mayor Junard ‘Ahong’ Chan sa Dakbayan sa Lapu-Lapu nga magsugod na sa bulan sa Septiyembre 2023 ang infrastructure works alang sa gisugyot nga 12 ka kilometro nga Lapu-Lapu City skyway project nga nagkantidad og P24.8 bilyones.
Matud ni Chan nga masaligon siya nga kon mahuman ang maong proyekto paspas na unya ang pagbiyahe paingon sa Mactan-Cebu International Airport.
Ug makasulbad usab kini sa problema sa kahuot sa trapiko sa siyudad tungod kay aduna man kini exit sa lain-laing mga barangay ug dili na magpunsisok ang mga motorista.
Si Chan nagkanayon nga ang maong proyekto maoy labing una sa the Visayas ug Mindanao nga ipatumaan pinaagi sa Private-Public Partnership (PPP) tali sa Lapu-Lapu Expressway (LLEX) Corporation ug sa kagamhanan sa siyudad.
Gitataw ni Chan nga sanglit ipatuman man ang maong proyekto ubos sa PPP scheme ang kagamhanan sa siyudad dili makagasto bisan usa ka sentabo.
Dugang ni Chan nga sa higayon nga mahimo na nga operational ang maong proyekto ang kagamhanan sa siyudad makadawat usab og bahin sa makolektang toll fee gikan sa mga motorista. BDB (BANATNEWS)