PAGASA: LPA nakasulod na sa PAR

CEBU, Philippines — Nisulod na sa Philippine Area of Responsibility (PAR) ang Low Pressure Area (LPA) hinungdan sa mga nasinati karong mga pagulan sumala pa sa Philippine Atmospheric, Geophysical and Astronomical Services Administration (PAGASA).

 Ang mga lugar sa Luzon sama sa Aurora, Quezon ug Camarines Norte makasinati og kusog nga uwan nga anaay pagnugdog ug kilat.

Matud pa sa PAGASA ang LPA nakita nga anaa na sa 295 km apan anaa gihapon sa silangang bahin sa Infanta Quezon. Ang LPA anaa lamang gamay nga posibilidad nga mahimong bagyo sa mosunod nga 24 ka oras.

Ang PAGASA nipahimangno gihapon  nga masinati ang hanging habagat sa tibuok Pilipinas  uban sa posibilidad nga makasinati og katag-katag nga pag-uwan, pagnugdog ug kilat busa gipahimangnoan ug gipahinumduman ang tanan alang sa posibleng pagbaha ug landslide.

Sa uwahing update sa PAGASA Visayas giisa na ngadto sa Thunderstorm Advisory No. 15 ang mga lugar sa Leyte sa Matalom ug Inopacan, Southern Leyte sa Maasin City ug Macrohon, ingon man sa Cebu sa Lapu-Lapu City, kining mga lugara makasinati sa kasangaran hangtod sa kusog nga pag-uwan, inubanan sa kilat ug kusog nga hangin.

Duna say pag-uwan nga masinati sa Samar sa may Tarangan ug Paranas, silangang bahin sa Samar sama sa Can-Avid, Taft ug Sulat, ingon man sa habagatang bahin sa Leyte sama sa Liloan, San Juan, Anahawan ug Cebu sa Cordova ug ingon man sa silingang bahin sa lugar.

Ang Metro Cebu makasinati og madag-umon hangtod sa mauwan nga mga adlaw sugod karong adlawa Biyernes hangtod sa Domingo gumikan gihapon sa hanging habagat ug LPA. (BANAT NEWS)