CEBU, Philippines — Ang lokal nga kagamhanan sa Dakbayan sa Danao nagplano sa pagtukod sa Museo De Danao karong tuiga.
Matud ni Mitch Mondigo, tigpamaba sa siyudad nga nikabat ngadto sa P28 milyones ang pundo niini diin kuhaon kini sa panudlanan sa tourism office.
Adunay P3.5 milyones alang sa phase 1 nga gipaabot nga masugdan og trabaho karong tuiga.
Ang nahisgutang proyekto itukod kini diha sa luna sa karaan nga police station sa siyudad nga adunay gilapdon nga 800 metro kwadrado.
Ang maong dapit mao usab ang lokasyon sa karaan nga Spanish Municipal Site sa 1860s ug dayon nahimong Danao Provincial High School ug sunod naturokan sa Danao City Police Station.
Karon, ang maong luna gamiton kini alang sa usa ka edipisyo nga makapakita sa culture ug heritage sa siyudad.
Matud ni Mondigo nga gawas sa museo adunay espasyo usab niini nga igahin alang sa mga Danawanon nga makaapil sa mga skills-related workshop sama sa painting ug pottery making. (BANAT NEWS)