Negosyante, 2 sakop gidagit

CEBU, Philippines — Giingong gidagit ug gitulis ang tulo ka indibidwal apil ang usa ka negosyante sa mga wala pa mailhing mga armadong lalaki diha sa Carbon Public Market niadtong adlaw’ng Lunes, Hulyo 10, 2023.  Gikompirmar sa kapulisan sa Dakbayan sa Talisay nga tulo ka lalake ang ilang nakit-ang gipanghigtan ug gitaptapan ang mga mata sa sulod sa giabandonar nga puti nga van sa Barangay Campo 4.

Giila ang mga biktima nga sila si Jason Montero Co, 49, usa ka Chinese National ug negosyante ug mga trabahante niining si Virgilio Zanzan Lerin, 46, ug usa ka 16 anyos nga lalaki.

Sigon ni Police Lieutenant Colonel Randy Caballes, hepe sa Talisay City Police Station nga nakuha sa mga tulisan ang dili momenus P100,000 nga cash, cellphone, ATM Cards ug ubang pang importanteng gamit sa mga biktima.

Alas- 8 sa buntag niadtong adlaw’ng Lunes, ang tulo ka lalake giingong nag-load og stocks sa sakyanan ni Co diha sa Carbon Public Market sa dihang dunay upat ka mga lalaki ang miduol ug pugsanon silang gipasakay sa van.

Gihigtan ang ilang mga bukton, tiil ug gitaptapan ang mga mata ug gidala sa Barangay Campo 4 sa Talisay City ug giabandonar.

Ang tanod na sa lugar ang nakabantay sa gi park nga van sa highway nahibulong maong gisusi ang mga sakay niini. Pagkakita sa mga biktima, iyaha silang gitaabangan.

Gidala ang mga biktima sa Barangay Hall ug gi-contact ang kabanay sa negosyante.

Subay sa hitabo si Police Lt. Col. Gerard Ace Pelare, tigpamaba ni Police Regional Office (PRO)-7 Director Brigadier General Anthony Aberin miingon ang kapulisan sa Waterfront Police Station 3 sa Cebu City Police Office ug Talisay City Police Station maghiusa sa paghimo og imbestigasyon sa hitabo.

Gisusi karon ang mga CCTV cameras sa Carbon Market, nahibulong matud pa ang mga polis kay walay mga tawo sa duol diin gidagit ang tulo nga nakabantay nga dunay komosyong nahitabo anang adlawa. “Right now as our coordination with the Police Stations concerned this is still an open investigation nothing yet is final, we are not concluding nga tinuod or dili tinuod nga gitulis,” pasabot pa ni Pelare. IBM (BANATNEWS)