CEBU, Philippines — Patay ang usa ka helper sa dihang nakuryentihan samtang nagtrabaho sa gibaradero nga barko diha sa usa ka shipyard sa Barangay Tayud, Lungsod sa Consolacion niadtong Sabado, Hulyo 8, alas 2:00 sa hapon.
Ang namatay giila nga si Auldry Cabusa Vertodaza, 25, taga Brgy. Tapilan, Lungsod sa Daanbantayan.
Niadtong Hulyo 9, 2023 pasado 1:30 sa hapon ang inahan sa biktima nga si Florenda Cabusa Vertodazo, 54, mitunga sa Consolacion Municipal Police Station aron isumbong ang nahitabo sa iyang anak nga nakuryentihan niadtong Sabado.
Sa gihimong imbestigasyon sa kapulisan, nasayran nga nanglimpyo sa gibaraderong barko ang namatay ug mga kauban anang tungora apan matud pa aksidente niining nasabod ang live wire nga miresulta sa iyang pagkakuryente.
Gidala siya sa tambalanan sa Eversley Hospital apan gideklarar nga dead on arrival.— Romeo Marantal (BANAT NEWS)