BFAR nipahimangno sa dili pagkaon sa devil’s crab

CEBU, Philippines — Ang Bureau of Fisheries and Aquatic Resources (BFAR)-9 nipagawas og pahimangno kabahin sa usa ka klase sa kasag nga giilang kalas-kalas, kuray o devil’s crab nga giingong makahilo.

Base sa gipagawas nga public advisory sa BFAR-9 diha sa ilang Facebook page gipahimangnoan niini ang tanan sa dili pagkaon sa maong kasag.

Ang kalas-kalas, kuray o devil’s crab nga adunay scientific name nga “Zosimus aeneus” base sa pagtuon giila kining labing makahilo sa tibuok kalibutan.

Giingong ang maong klase sa kasag aduna kini “lethal neurotoxins” o mga substance nga makahilo sa nerve tissue sama sa “Tetrodotoxin” nga susama sa butete ug “Saxitoxin” nga makaresulta sa pagka-paralyze.

Ang maong pagpahimangno gipagawas human nga usa ka pamilyahan ang nangahilo tungod sa pagkaon sa kalas-kalas didto sa Zamboanga Del Norte.

Base sa taho nga walo ka miyembro sa pamilya ang nangahilo human nikaon sa maong kasag.

Ang usa ka miyembro sa pamilya nga si Arnel Tabanao ang gideklarang namatay human sa insidente samtang ang laing pito anaa pa sa tambalanan diin padayon pa nga giobserbahan ang ilang kahimtang.

Lakip sa pahimangno mao ang mga timailhan sa pagkahilo human sa pagkaon sa kasag sama sa pagpamanhod sa dila ingon man sa palibot sa baba, paglisod og ginhawa, paghuot sa dughan, pagsuka, pagka-uhaw, pagkalipong, pagkapawong sa panan-aw, pagsakit sa ulo, pagsakit sa tiyan o diarrhea, lisod sa paglitok ug paglamoy, ug pagka-paralyze sa kaunoran nga mahimong mo sangpot sa kamatayon.

Si Al-Zath Kunting, direktor sa BFAR-9 sa iyang pamahayag diha sa ilang Facebook page nagkanayon nga ang mga hilo nga dala sa maong matang sa kasag dili mamatay bisan pa sa pila ka oras niining pagluto.

Si Kunting subling niawhag sa publiko sa paglikay nahisgutang klase sa kasag.