CEBU, Philippines — Dili angay ikabalaka sa mga residente diha sa Sitio CRCI sa Barangay Apas, Dakbayan sa Sugbo ang pagpatuman og Bus Rapid Transit (BRT) project matud ni Gobernador Gwendolyn Garcia.
Kini gumikan kay dili sila mapahawa sa maong dapit gawas kon andam na ang relocation site nga ilang mabalhinan.
Ang mga residente sa CRCI (Cebu Rehabilitation Center Inc.) kasamtangang nagpuyo sa luna nga gipanag-iya sa Kapitolyo duol sa National Food Authority regional headquarters dapit sa Gov. Mariano Cuenco Avenue duol sa Cebu IT Park.
Matud ni Garcia nga ang BRT project implementers naglaraw nga ang CRCI area maoy tukoran sa usa sa mga bus stations sa BRT.
Ug aron nga mapadayon ang maong kalamboan sa proyekto ang gobernador nagkanayon ngadto sa mga ukopante nga i-relocate kini ngadto usab sa luna nga gipag-iya usab sa Kapitolyo diha sa Barangay Kalunasan.
Base sa taho sa Capitol Information Office nga ang maong lakang gihangop sa mga residente atol sa ilang tigom kagahapon diin nisaad ang gobernador nga ang relocation site maandam na daan sa dili pa gub-on sa BRT team ang mga balay sa residente.
Uban sa Pag-IBIG Fund, ang Kapitolyo mobaligya sa maong mga luna ngadto sa mga ukopante pinaagi sa taas nga financing terms.
Si Garcia uban ang mga opisyal sa Pag-IBIG Fund gikatakda nga magtagbo og balik uban sa mga residente sa Kalunasan ug CRCI aron ma-finalize ang ilang kasabotan. – BDB (BANATNEWS)