CEBU, Philippines — Gidakop sa kapulisan sa Lungsod sa Moalboal ang usa ka British national ug ang giingong kabit niini nga usa ka Pilipinas human midangop sa kapulisan ang asawa sa langyaw ug nagpakitabang kay gidala sa iyang bana ang maong babaye sa ilaha gyung panimalay sa Barangay Tuble, Lungsod sa Moalboal kagahapon sa alas-2 sa kaadlawon.
Sigon sa hepe sa Moalboal Police Station Police Captain Edilberto Timagos nasakpan sa 36-anyos nga asawa nga ang iyang bana ug giingong kabit nagkuyog sa ilang panimalay diha sa Moalboal gumikan sa Facebook post sa babaye.
“Magsige og post ang babaye, na-monitor niya (sa asawa),” ni Timagos pa.
Na-monitor sa asawa nga naa sa Cebu City ang post sa babaye hinungdan mibiyahi kini pabalik sa Moalboal kuyog ang iyang amahan ug miadto sa police station ug nangayo og tabang. Dala ang mga polis nakasulod ra dayon sila sa ilang balay ug didto nasakpan sa sulod sa kwarto ang langyaw ug giingong babaye niini nagdulog. Naka brief nalang ang bana nga naggakos sa kabit niini. Ang asawa nilarga sa Cebu City kay nagpabugnaw sa iyang gibati tungod kay gireklamo niya og pagpangulata ang iyang bana ug gikasuhan niya kini og kasong Violence Against Women and Children (VAWC).
Matud ni Timagos nga nagtrabaho sa usa ka bar sa dakbayan sa Mandaue ug Lapu-Lapu ang dinakpan nga babaye ug iyang kustomer ang bana sa reklamante hangtud nga sila nagkarelasyon.
Gipaabot nga pasakaan og kasong concubinage ug adultery ang duha ka mga dinakpan.— IBM (BANATNEWS)