CEBU, Philippines — Rama mopahigayon sa iyang SOCA karon
Ipahigayon karong buntag ang People’s State of the City Address (SOCA) ni Mayor Michael Rama ug giingong ibida niya ang mga labing importante nga programa alang sa katawhan.
Ang maong kalihokan ipahigayon diha sa Plaza sa Sugbo atubangang bahin sa Cebu City Hall.
Sa nangaging pamahayag ni Rama mao nga ang katawhan ang iyang giserbisyo hinungdan nga buboan niya kini og mga proyekto. Lakip sa SOCA ang paghatag ni Rama og ulahing kalamboan sa construction sa Cebu City Medical Center.
Sayo pa, gimandoan ni Rama ang mga nagdumala sa maong tambalanan nga buhaton ang kutob sa mahimo aron mahuman ang maong proyekto.
Si Rama nagkanayon nga kanunay siya nga naka-monitor sa kalamboan sa construction sa maong tambalanan.
Gikataho nga sa niaging buwan ubay-ubay nga mga kompaniya ang nipasalig kang Mayor Rama nga modonar sa CCMC ug gusto na nga i-turn over ang ilang donasyon apan alang sa transparency gusto usab ni Rama nga ang Cebu Medical Society ang modumala aron maklaro ang padulngan niini.
Ipatigbabaw usab sa programa mao ang paghingusog sa public-private partnership.
Ang CMS pinangulohan ni Dr. Peter Mancao kinsa sa pagkakaron mao usab ang bag-ong hepe sa CCMC nagkanayon nga nagkasabot na ang ilang mga opisyal ug miyembro sa pagdumala sa mga donasyon ug accounting.
Si Rama kinsa maoy mayor niadtong tuig 2014 nimando nga gub-on ang karaang CCMC building human kini nakaangkon og dakong kadaot atol sa 7.2 magnitude nga linog nga niigo sa Central Visayas niadtong tuig 2013.
Ang pagtukod sa bag-ong CCMC building nagsugod niadtong tuig 2015. —/BDB (BANAT NEWS)