CEBU, Philippines — Laing sementeryo nga nahimutang sa Dakbayan sa Sugbo ang i-convert usab ngadto sa Heritage Park ug kini mao ang Cebu Chinese Cemetery ug karong Hulyo 12, 2023 ang ground breaking niini.
Gibutyag ni Cebu City Mayor Michael Rama nga motabang alang sa maong tinguha mao ang Asociacion Benevola de Cebu Inc. (ABCI) ug duna na sila'y komunikasyon niini. Si kanhi Cebu City Health Officer Dr. Jeffrey Ibones maoy gitahasan ni Rama nga mangulo sa maong proyekto.
Nagkanayon ang mayor nga gi-areglar na ang posibleng paghawan sa mga illegal nga istraktura nga gitukod sa maong sementeryo.
Hinuon ang mga maapektohan sa clearing operation gikatakdang malakip sa housing program sa Dakbayan.
Sa higayon nga mahimo na kini nga heritage park, madugangan napud og tourist attraction ang dakbayan nga naghatag usab og importansya sa kultura ug kasaysayan.
Ang maong mga lakang kabahin gihapon sa pagsanong sa tinguha ni Rama nga masusama kini sa nasud sa Singapore. (BANAT NEWS)