CEBU, Philippines — Nadakpan sa kapulisan pinasikad sa search warrant ang kapitan sa Barangay Baclayan, Lungsod sa Boljoon tungod sa paghupot og mga dili lisensyadong mga armas.
Ang operasyon kabahin sa Simultaneous Anti-Criminality Law Enforcement Operation pasado alas 6 sa buntag kagahapon, Martes, Hunyo 20, 2023.
Gi-serve sa kapulisan sa naasoy nga lungsod ang search warrant batok ni Elderson Han Baldezamo Mabalatan ang kasamtangan nga Kapitan sa Barangay Baclayan.
Si Executive Judge Francis Rainer Navarrete sa Regional Trial Court sa Argao mao ang ni-issue sa search warrant sa kalapasan sa Republic Act 10591 o Comprehensive Firearms and Ammunition Regulation Act.
Sigon ni Police Staff Sergeant Randolph Pelonio, desk officer sa Boljoon Municipal Police Station, pagsusi sa kapulisan sa balay sa kapitan nakuha nila ang duha ka kalibre .45 nga armas, usa ka granada ug 25 ka bala sa kalibre .45.
Pulos walay mga dokumento o lisensiya nga napresentar ang kapitan sa maong mga armas ug eksplosibo sigon pa ni Pelonio.
Gikatakda nga pasakaan og kasong kalapasan sa Republic Act 10591 ang dinakpan. — IBM (BANATNEWS)