CIDG-8 nagpakitabang kabahin sa nahimutangan  sa tulo ka wanted

CEBU, Philippines — Nanawagan ang Criminal Investigation and Detection Group (CIDG)-8 sa publiko nga mohatag og impormasyon kalabot sa nahimutangan sa negosyante nga si Michelle Go-Chu ug Magtiayaong Lorenza ug Jerlyn Joyce Baltonado kinsa gipangita karon sa kapolisan.

Kini maoy hangyo ni Police Lieutenant Colonel Arwin Tadeo, officer-in-charge sa CIDG-8 kinsa nahinabi sa mga tigbalita atol zoom press conference.

Si Go-Chu nalutsan og warrant of arrest sa Regional Trial Court (RTC) Branch 29 sa Dakbayan sa Toledo niadtong Mayo 15, 2023  gumikan sa kasong large scale estafa nga gisang-at sa Sugbuanong negosyante nga si Kaiser Tan.

Ang magtiayong Baltonado nalutsan usab og warrant of arrest niadtong buwan sa Enero niining tuiga.

Walay piyansa nga girekomendar ang korte alang sa temporaryong kagawasan sa mga suspetsado.

Matud ni Tadeo nga human nila madawat ang warrant of arrest ni Go-Chu ilaha dayon kining gi-serve sa panimalay niini sa Ormoc City niadtong Mayo 16, 2023 apan wala kini sa ilang panimalay.

Gipasalig ni Tadeo nga anaa pa sa Pilipinas ug wala pa makalarga sa laing nasud ang mga suspetsado.

Gipahibawo ni Tadeo nga nikabat ngadto sa P1.5 milyon ang reward sa makahatag og impormasyon ug makatudlo sa nahimutang sa mga suspetsado kinsa si Tan ang andam mohatag og reward.

Gikataho nga ang magtiayong Baltonado ug Go-Chu unang nalutsan og warrant of arrest sa Regional Trial Court Branch 59 sa Dakbayan sa Toledo sa kasong large scale estafa niadtong Enero 23 niining tuiga.

Apan nianang Pebrero 14, 2023 gibakwi sa korte ang warrant of arrest ni Go-Chu human gipaboran sa korte ang petition niini nga isuspenso ang iyang warrant ug ipaubos sa preliminary investigation ang kasong iyang giatubang.  Nunot niini, gimandoan usab sa korte ang Toledo City Prosecutor's Office sa pagpaubos sa kaso sa reinvestigation.

Apan human sa gipahigayong reinvestigation nasuta nga adunay probable cause ang pagpasaka og kaso batok kang Go-Chu hinungdan nga nalutsan na usab kini og laing warrant of arrest niadtong Mayo15, 2023. —/BDB (BANAT NEWS)