CEBU, Philippines — Gipatuman na sa kapolisan sa Siyudad sa Naga ang programa nga magpakatap og mga polis ngadto sa kabarangayan.
Ang programa nga “Kapulisan sa Barangay” gihimo ubos sa liderato ni Police Lieutenant Colonel William Homoc.
Matud ni Homoc nga mao kini ang paagi nga mopaduol ang kapolisan ngadto sa katawhan diin sila na mismo ang moanha sa matag barangay.
Ang programa gilusad uban ni Engineer Arthur Villamor, city administrator sa siyudad ug si Police Lieutenant Colonel Tomas Santander, Jr., mga kapitan, force multiplier ug uban pa.
Si Homoc adunay ibutang nga polis sa matag barangay aron makigtambayayong sa opisyales ug ngadto sa komunidad.
Gusto nila nga mapalambo ang pagresponde sa labing paspas, pagpalambo sa pagsalig sa katawhan ngadto sa kapolisan ug matubag ang mga yango-ngo.
Dugang ni Homoc nga dili mag-limit ang kapolisan sa paghatag og seguridad apan lakip na ang pag-umol og maayong relasyon ngadto sa katawhan. (BANAT NEWS)