Nag-solo Camping gitulis
CEBU, Philippines — Gipukaw og tulisan ang usa ka lalaking nag inusara nga nag-camping sa Little Switzerland sa Barangay Manipis, Dakbayan sa Talisay kagahapon sa kaadlawon.
Si Pein Contineta Nazareno, nibutyag nga natulog na siya diha sulod sa iyang tent ug nakamata sa pagkadungog sa naghinunghongay nga mga lalaki sa gawas.
Iya lang kini nga gipaminaw hangtud nga gilaslas ang iyang tent dayon mideklarar sila og tulis. Matud pa ni Nazareno nga kamot sa tulisan nga nagbitbit og .38 nga revolver ra ang iyang nakita, wala na siya mopalag pa.
Nakuha sa mga tulisan ang iyang cellphone, kwarta, cooking set ug butane. Nagkanayon si Nazareno nga wa gyud siya makakita sa dagway sa mga tulisan nga misibat ra sab dayon.
Ang iyang gibuhat mao ang pagtago sa kasagbutan sa kabalaka nga siya balikan.
Si Police Lt. Col. Randy Caballes, hepe sa kapolisan sa Talisay nibutyag nga naghimo na sila og follow up operation.
Siya nitataw nga ilang subayon ang lugar nga nahitaboan kung aduna ba silay makuhang mga impormasyon labot sa mga tulisan sa dapit.
Wala pa masuta kun kini pa ang unang higayon nga dunay insidenteng sama niini nga nahitabo sa lugar. (BANAT NEWS)
- Latest
