CEBU, Philippines — Subling gipahinumduman sa Police Regional Office-7 ang ilang mga tawo mahitungod sa “no take policy” gikan sa illegal gambling subay sa gipagawas nga kamanduan si PNP Chief Benjamin Acorda Jr. labot niini.
Hinoon dili na kini bag-ong kamandoan sumala pa sa tigpamaba ni Police Regional Office-7 Director Brigadier General Anthony Aberin nga si Police Lt. Col. Gerard Ace Pelare sanglit mipagawas sab sa maong direktiba si Aberin dihang miasumir kini sa katungdanan.
Gimanduan sa PRO-7 ang tanang police stations sa pagpahigayon og tinud-anay ug sinserong operasyon batok illegal gambling.
Lauman matod pa ang mas gipalig-on ug mas gihingusgan nga operasyon batok sa illegal gambling.
Kun pananglitan dunay mga polis nga masakpang tigdawatan og kita sa illegal gambling dili magpanuko ang PRO-7 sa pagpahamtang og silot. Ang unit sa Integrity Monitoring and Enforcement Group (IMEG), Regional Intelligence Division ug Criminal Investigation and Detection Group (CIDG) pipila lang sa unit nga mag-monitor kinsa ning mga police nga nalambigit illegal gambling.
Makita sa anti-criminality operations sa PRO-7 nga daghan angt nangadakpan sa illegal gambling nga matud pa nila indikasyon nga seryuso ang kapulisan sa pagsumpo sa illegal nga sugal.
Nasayran sa Cebu Province adunay usa ka legal gambling operator nga nag-operate nga mao ang Saturn Gaming N’ Amusement Corporation.
Gumikan kay mipagawas man og Writ of Preliminary Injunction si Judge Aileen N. Saguing-Agacita sa RTC
Mandaluyong City pentsahan Mayo 26, 2023 mobalik na ang ilang operasyon.
Una niini, gipahunong sa Philippine Charity Sweepstakes Office(PCSO) ang ilang operasyon gumikan sa mga technical issue.
Sugod karong adlaw Lunes, Mayo 29, 2023 balik ang ilang operasyon sa Probinsiya sa Sugbo.—Decemay P. Padilla/IBM
11 ka island barangays sa LapuLapu tinguhang ma drug cleared
Negatibo ang 25 ka mga drug surrenderees sa Barangay Caubian sa Isla sa Olango sa drug test nga gipahigayon sa buhatan sa City of Lapu-Lapu for Substance Abuse Prevention.
Si Garry Lao, executive director sa CLOSAP miingon nga ang maong mga drug surrederrees gipaubos sa unom ka bulan nga community base drug rehabilitation.
Matud pa ni Lao nga ang Barangay Caubian gikonsiderar nga mahimo na kining drug cleared barangay.
Gitinguha sa CLOSAP nga maningkamot ang 11 ka barangay sa mga isla sa Lapulapu City nga ma-drug cleared tanan, sa pagkakaron ang Barangay Caohagan , Tinggo, Baring ug Sabang palang ang drug cleared.
Sa pikas bahin, tulo ka gipasanginlang mga drug pushers ang nadakpan sa usa ka semanang operasyon sa kapolisan sa Danao City Police Station.
Si Police Lieutenant Colonel Judy Mar Bonilla, Officer - In-Charge sa Danao City Police Station miingon nga laing tulo nga ilang nadakpan sa ilegal nga sugal hantak ug nasakmit nila ang P325 nga pusta.
Nadakpan usab nila ang usa ka armadong lalaki nga walay lisensiya, duna say usa ka .45 kalibre pistola nga boluntaryong gitahan kanila.
Samtang sa checkpoint, 54 ka mga driver ang naisyuhan og citation ticket. — /IBM (BANAT NEWS)