CEBU, Philippines — Nikabat ngadto sa P748,000 ang kantidad sa 110 ka gramong shabu ang nasakmit sa kapolisan sa Presinto 5 sa Mandaue City Police office gikan sa suspetsadong pusher sa niaging gabii diha sa Barangay Looc, Dakbayan sa Mandaue.
Si Police Major Erwin Abrasado, hepe sa Presinto 5 nga nagbase sa Barangay Opao sa maong siyudad niila sa suspetsado nga si Mark Anthony Acaso, 22 –anyos, nagpuyo sa maong dapit.
Si Police Staff Sergeant Wilken Enrecoso sa Presinto 5 nagkanayon nga natigayon ang ilang buy-bust operation human nila nakompirmar nga ang suspetsdo nagpahigayon og ilegal nga kalihokan diha sa lugar.
Matud ni Enrecoso nga unang higayon pa nila na nadakpan si Acaso.
Ang suspetsado mag-atubang og kasong kalapasan sa Section 5 ug Section 2 sa Akta Republika 9165 kun “Comprehensive Dangerous Drug Act of 2002”. – BDB (BANATNEWS)