CEBU, Philippines - Nakadawat og pinansiyal nga ayuda ubos sa Tabang Mandaue Program ang 538 ka pamilya sa Barangay Looc ug Barangay Cambaro sa Siyudad sa Mandaue.
Ang maong mga pamilya nga gilangkoban sa 242 sa Barangay Cambaro ug 296 sa Barangay Looc maoy mga benepisaryo sa Tabang Mandaue Program nga gipasiugdahan sa kagamhanan sa siyudad nga gitawag og financial assistance for individual in crisis situation.
Si Mandaue City Mayor Jonas Cortes ug bise mayor Glenn Bercede maoy nangulu sap ag apod apod sa P5,000 nga hinabang sa mga benepisyaro sa Barangay Cambaro nga gisaksihan usab sa mga sakop sa konseho.
Gidawat usab sa 296 ka mga benepisaryo sa Barangay Looc ang pinansiyal nga ayuda ug gipangulohan ni Bise Mayor Glenn Bercede ang pagtunol sa maong hinabang.
Si Looc Barangay Captain Allan Siazon nga mihangop sa maong programa ang mipadayag sa iyang pagpasalamat ngadto kang Mayor Cortes ug sa tanang sakop sa konseho. (CEBU NEWS)