CEBU, Philippines — Nabakunahan na sa siyudad sa Mandaue ang kapin sa 50 porsyento sa ilang target nga kabataan nga bakunahan batok sa measles, rubella ug polio.
Gitug-an ni Mandaue City Health Officer Dr. Debra Maria Catulong nga sa kasamtangan moabot na sa 54.88 porsiyento sa ilang target nga 34, 000 ka mga bata ang nabakunahan batok sa measles ug rubella.
Samtang 52 porsyento sa ilang target nga 40,000 ka bata ang nakadawat og oral polio vaccine.
Ang measles ug rubella vaccines ihatag sa mga bata nga nag edad og siyam ka buwan ngadto sa singko anyos samtang ang oral polio vaccine ihatag sa mga bata nga nag-edad og 0 ngadto sa singko anyos.
Gitug-an ni Catulong nga duna gihapoy mga ginikanan nga nagdumili sa pagpabakuna sa ilang mga anak sa kahadlok nga duna kini mga side effects.
Ang mga health workers mipasabot na sa mga ginikanan sa ka importante sa maong mga vaccines aron malikayan nga masakit sa maong matang sa mga sakit ang kabataan. (BANAT NEWS)