CEBU, Philippines — Si Dr. Pater Mancao mao na karon ang bag-ong officer-in-charge sa Cebu City Medical Center (CCMC).
Si Mancao ang kaalyado ni Cebu City Mayor Michael Rama.
Base sa taho sa public information office sa siyudad nga ang pag-anunsiyo kalabot sa pwesto ni Mancao nahitabo niadtong Huwebes sa gabii. Nasayran nga dul-an na sa usa ka tuig nga nagsilbi si Mancao isip chairperson sa Task Force CCMC.
Gihangop ni Mancao ang tahas nga gihatag ni Rama kaniya ug wala siya nagduha-duha sa pagdawat niini gumikan kay aduna siya’y dakong pagsalig sa liderato ni Rama.
Giangkon ni Mancao nga aduna na siya’y kamandoan sa mayor alang sa iyang posisyon ug magpaabot nalang siya sa pormal nga anunsiyo sa tukmang nga petsa sa pagsugod sa trabaho.
Matud ni Mancao nga usa sa mga nag-unang kamandoan ni Rama kaniya mao ang pagsiguro nga mahatud sa katawhan ang quality health care.
Mohimo usab siya og koordinasyon sa Cebu City Health Department alang sa pagpalambo sa barangay health centers aron dili maghuot sa CCMC ang mga tawong magpa-checkup nga adunay minor nga mga balatian.
Si Dr. Anton Oliver Reposar maoy gipulihan ni Mancao.
Magpabilin gihapon si Reposar sa iyang orihinal nga item isip assistant head sa CCMC.
Usa si Mancao sa mga napildi nga kandidato pagka-konsehal sa piniliay niadtong tuig 2022 ubos sa grupo ni Rama nga BARUG-PDP Laban. — BDB (BANATNEWS)