CEBU, Philippines — Human sa panawagan sa pipila ka magbabalaod kabahin sa pagbalik sa academic calendar partikular na ang pormal nga pagbukas sa klase sa buwan sa Hunyo adunay susama nga hangyo nga gipadangat sa usa sa mga sakop sa konseho sa Dakbayan sa Sugbo .
Si Cebu City Councilor Rey Gealon niduso og resolusyon nga naghangyo sa Department of Education nga ibalik na ang karaang pamaagi diin sa matag buwan na sa Hunyo ang pormal nga pagbukas sa klase.
Gikataho nga tungod sa pandemiya gihimong Agosto ang pagbukas sa klase.
Apan matud ni Gealon nga sa higayon nga mosulod na ang buwan sa Marso masinati na ang grabeng kainit sa panahon ug nakaapekto kini sa "learning environment" sa mga tinun-an ug magtutudlo.
Ug ang sobrang kainit nakahatag kini og risgo ngadto sa panglawas sa mga tinun-an ug magtutudlo.
"This school year is the first time that there is an in-person classes during summer time and it proved to be detrimental, let alone hazardous and perilous to the physical and mental well-being of students and teachers alike", Gealon pa.
Panahon usab sa summer mao paghatag sa mga tinun-an og kalidad nga oras sa ilang pamilya. — BDB (BANATNEWS)