CEBU, Philippines — Human hingpit nga na-demolis ang V-hire terminal diha sa Kamagayan sa Dakbayan sa Sugbo, gihimo dayon kini nga night market.
Suma pa ni Maria Pino kinsa usa sa mga nagdumala sa nagkalain-laing night market sa Dakbayan nga gihatagan gyud nila og prayoridad ang mga vendors nga apektado sa pagka-demolis sa v-hire terminal.
Ang maong night market gitawag og “Tsibogan sa Kamagayan” nga mobukas sa alas 4 sa hapon hangtud sa alas 2 sa kadlawon.
Gilusad kini sa niaging gabii nga gitambongan mismo ni Mayor Michael Rama ug pipila ka department heads sa City Hall.
Matud pa ni Pino nga lamian nga mga pagkaon ang gidalit sa maong night market
Nasayran nga ang maong area pagatukoran alang sa housing project sa mga empleyado sa City Hall.
Samtang wala pa nasugdan ang maong housing project, ang Tsibogan sa Kamagayan lang una ang mogamit sa area.
Gitataw hinoun ni Pino nga ipahimutang gihapon og tarong sa kagamhanan ang vendors sa higayon nga gamiton na ang luna.
Kahinumdoman nga gipagamit ni Cebu Governor Gwendolyn Garcia ang luyong bahin sa Cebu South Bus Terminal (CSBT) isip temporary terminal sa mga v-hire nga gipapahawa sa Kamagayan.
Sa nangaging mga adlaw, nipadayag ang Kagamhanan sa Siyudad nga ang mga v-hire operators nga nagmugna og terminal kaniadto diha sa Kamagayan matud pa wala kini permit o kontrata sa lokal nga kagamhanan. /MEL (BANAT NEWS)