CEBU, Philippines — Nasikop ang usa ka 22-anyos nga lalake nga nanunggab sa kainom nga 19 anyos nga lalake diha sa diskohan kagahapon sa kaadlawon sa Sitio Manghupe, Barangay Can-asujan, Dakbayan sa Carcar.
Ang suspek mao si si John Michael Sismar Fano, 22, residente sa Sitio Pit-os Barangay Calidngan sa naasoy nga dakbayan.
Samtang ang biktima mao si Jericho Rebuyas, 19, kinsa nakaangkon og unom ka samad dinunggaban sa kalawasan nagpaalim karon sa tambalanan.
Nangunay ang hepe sa Carcar City Police Station sa hot pursuit batok sa suspek ug ilaha kining naabtan nga nagtago sa mga kabanay sa Barangay Liburon, Lungsod sa San Fernando.
Sa report sa kapulisan sa dakbayan sa Carcar ang biktima dunay disko sa lugar ug nag-inom kauban ang mga higala.
Tungod kay nakainom na, langas na maglihoklihok ang biktima maong nasaghiran niini ang baso sa suspek ug nabuak kini. Ang suspek gikatahong nasuko ug diretsong miibot og kutsilyo ug gihansakan ang biktima unom ka higayon. Pagkahuman niini dalidali kining miikyas samtang ang biktima gidala sa Carcar Provincial Hospital.
Sakuban nalang sa kutsilyo ang narekober sa kapolisan ug padayon pa gipangita ang kutsilyo nga gigamit sa krimen. Sigon sab sa opisyal nga duna nay record ang suspetsado sama sa pagpangulata ug uban pang sala.
“Kining suspect bugoy man ni, maldito man ni, naa pud gyuy batasan kanang siga-siga ba,” sigon ni Cabagnot.
Ang dinakpan mag-atubang og kasong frustrated murder. — /IBM (BANAT NEWS)