CEBU, Philippines — Gipasakaan na og kaso ang tag-iya sa luna nga nagkawot og yuta aron himoong septic tank nga maoy gikalumsan sa magsuong Llamedo didto sa Barangay San Roque, Dakbayan sa Talisay niadtong Abril 9 ning tuiga.
Ang magsuon nga sila si Mark Emman, 6 anyos ug Nathaniel, 7 anyos giingong nanghimasa sa wala tabuni nga gikawot nga septic tank apan ang mga bata nangahagbong ug nangalumos.
Matud pa ni Atty. Giovanni Sususco, City Legal Officer sa siyudad sa Talisay nga nipatim-aw lang sa barangay hall ang tag-iya sa luna nga taga Dakbayan sa Lapu-Lapu apan walay bisan usa ka sentimo nga gitunol alang sa kabanay sa nangamatay.
Si Sususco ubos sa kamanduan ni mayor Gerald Anthony “Samsam” Gullas nisusi sa mga dokumento sa pagkawot sa yuta ug nakita nga wala kini permit. Ang taga City Engineering Office ug ang ginikanan sa bata ang gipaduso og affidavit aron mahingpit ang pagsang-at sa kaso may kalambigitan sa building code ingon man reckless imprudence resulting in homicide.
Ang pagpasaka sa kaso ngadto sa piskaliya nahitabo niadtong adlaw nga Biyernes. — MEL ( Banat News )