Tourism program sa Sugbo gibida sa Go Negosyo Summit

CEBU, Philippines — Gibida sa Probinsya sa Sugbo ang mga tourism program niini atol sa gipahigayon nga Go Negosyo Summit 2023 kagahapong adlawa diha sa usa sa mga mall sa dakbayan sa Sugbo.

Sa usa ka video presentation, gipakita ni Gobernador Gwendolyn Garcia ang malampuson nga tourism program sa lalawigan nga gipatuman niini nga nakatabang sa paglambo sa Sugbo ilabina human sa pandemya sa COVID-19 ug sa bagyong Odette.

Apil na sa mga programa mao ang Suroy-Suroy Sugbo, R’Cebu program ug uban pa.

Gidapit usab ni Garcia ang mga turista ma lokal man o langyaw nga padayon sa pagbisita sa Sugbo sanglit dako ang natampo niini sa ekonomiya sa isla.

Si Tourism Secretary Christina Garcia-Frasco sa iyang mensahe nagkanayon nga dako ang natabang sa Sugbo sa kinatibuk-an nga tourism development sa nasud.

Ang Tourism Summit usa ka programa nga gipasiugdahan sa Go Negosyo sukad niadtong 2019 kon diin ang founder niini mao si Joey Concepcion.

Karong tuiga nga summit gitinguha sa mga organizers nga mahisgotan pa ang mga ideya ug insights alang sa umaabot pa nga tourism ug economic opportunities ilabina sa mga micro, small medium enterprises sa tourism industry.

Si Cebu City Mayor Mike Rama nitambong usab sa maong kalihokan kagahapon. — MEL ( Banat News )