Pagtukod og museum ni Datu Lapu-Lapu ipresentar sa DOT
CEBU, Philippines — Nakigtagbo na si Lapu-Lapu City Mayor Junard “Ahong” Chan sa mga opisyal sa National Historical Commission of the Philippines ug sa Department of Tourism nga gipangulohan ni Christina Garcia-Frasco, aron mapadayon ang tinguha sa siyudad nga Museum ni Datu Lapu-lapu.
Kahinumduman ang maong plano gi-presentar na kini kanhi sa local nga kagamhanan apan wala mapatuman human usab sa nilabay nga covid-19 pandemic ug sa pag-igo sa bagyong Odette.
Matud pa ni Chan, ila nang gituki ang maong plano uban sa mga opisyal sa NHCP ug mismo ni DOT Secretary Frasco.
Ang maong plano pormal nga ipresentar ni mayor Chan ngadto kang Frasco ug malaumon sila nga makatabang sa katumanan sa maong plano.
Gibutyag sa Mayor, nga dako ug ikatabang ang maong museum ni Lapu-Lapu sa ilang turismo tungod kay makadani kini ug mga turista nga usa ka dakong garbo natong mga Pilipino tungod kay mao kini ang unang bayani sa Pilipinas.
Malaumon si Chan, nga mahatagan ug masulod kini sa budget sa NHCP ug sa DOT sa sunog tuig aron kini masugdan ug mangita siya ug mga buhatan nga mas makatabang pa alang sa katukuran niini.
Sa pagka karon ilang gitutukan usab ang pag restore kun pag-ayo sa Magellan Shrine nga apektado usab sa bagyong Odette. — MEL ( Banat News )
- Latest
