Pederasyon sa mga homeowners gitukod sa Talisay

CEBU, Philippines — Nagsugod na sa ilang tigum ang mga opisyales sa Federation of Home Owners Association uban sa City Advisory Council ingon man kapolisan sa Dakbayan sa Talisay.

Si Arlene Salahudin, president sa pederasyon nagkanayon nga gitutokan nila karon ang pag gama og polisiya sa ilang pederasyon nga mao sab ang sumbanan sa mga asosasyon sa home owners sa Dakbayan sa Talisay.

Matud pa ni Salahudin nga ang kaluwasan sa mga molupyo ang ilang prayoridad hinungdan nga sila nalipay nga namugna ang grupo aron dali ang ilang pagsangpit sa kapolisan kung unsa man ang ilang panginahanglan.

Matud pa niya nga kawat ug pagpanglungkab ang nag una nila nga problema.

Asoy pa ni Cyril Velasco, presidenti sa CAC nga sa primero nitutok sila sa mga negosyo apan nakahuna-huna sila nga ilang palapdan kay ang mga negosyante manguli man sab sa ilang mga panimay.

Sigon pa niya nga ang tumong sa grupo mao ang paglikay ug pagsumpo sa mga krimen.

Gani dili lang mga subdivision ang ilang gidawat sa pederasyon kundi kadto sab nga komunidad nga nalakip sa urban poor.

Si Police Lt. Col. Randy Caballes, hepe sa kapolisan nitataw nga ang maayo nga relasyon ug komunikasyon magdala sa nindot ug malinawon nga pagpuyo.

Gihangyo sab ni Caballes ang pederasyon nga kung adunay mga panghitabo sulod sa subdivision makahatag dayon sila sa CCTV footage aron makatabang sa imbestigasyon.  —  MEL ( Banat News )