Motor nasaghiran sa trak diha sa SRP viaduct naligsan patay

CEBU, Philippines — Patay ang usa ka lalaking nagmotor human kini nasaghiran ug dayon nalatayan sa usa ka trak nga nagsunod kaniya diha sa SRP viaduct sa Brgy. Ermita sa Siyudad sa Sugbo kagahapon sa buntag.

Ang biktima giila mao si Julius Lepon Dela Peña 25, residente sa Upper Laguerta Cebu City nga nagmaneho sa Honda Xrm 125 adunay plaka nga  4663-IP.

Samtang ang nakaligis  kaniya mao si Jose Lopez Caputolan  41, residente sa  Dungoan, Danao City nga nagmaniho sa trak nga nagkarga og mga pagkaon sa hayop nga adunay plaka nga  ACJ-111.

Sa inisyal nga imbestigasyon sa Carbon Police Station 5 nasayran nga ang biktima gikan sa Dakbayan sa Talisay ug sa pag-abot niini sa nahisgutang dapit nasaghiran kini sa nagsunod nga trak nga gimaneho ni Caputolan.

Matud pa naigo ang biktima sa step board sa tuo nga bahin sa trak hinungdan natumba kini ug nalatayan gyud sa maong sakyanan.

Alang sa kaluwasan sa tanang motorista, dunay gipasunod nga lagda diha sa viaduct hangtud na sa tibuok South Coastal Road, ang mga sakyanan nga hinay og dagan o wala magdali kinahanglang anha magsubay sa inner lane, ang mga paspas og padagan kinahanglang adto sa outer lane kini magsubay.

Wala pa maklaro kun kinsa sa duha ang wala motuman sa maong lagda sa lane nga pagasubayon.

Ang biktima dead on the spot samtang ang drayber sa maong trak nga si Caputolan gibalhog sa Carbon Police Station 5 aron pasakaan og kaso nga reckless imprudence resulting to homicide and damage to property.—  IBM (BANATNEWS)