CEBU, Philippines — Pulos mga local nga performers ang moapil sa kalihukan sa reenactment sa “Battle of Mactan” karong adlawa.
Suma pa ni Lapu-lapu City Mayor Junard ‘Ahong” Chan nga kun wala nay kakulian andam na ang tanan apil na usab ang venue, ug ang kapin sa usa ka gatus ka mga performer.
Nagkanayon si Chan nga tanang performers sa Kadaugan sa Mactan karong tuiga puros mga local artist, diin ang internationally acclaimed eskrimador ug amahan sa Lapu-lapu Arnis de Abanico, Jonel Pepito maoy modala sa Datu Lapulapu.
Samtang usa ka magtutudlo Henj Manlosa maoy modala sa Rayna Bulakna, ug usa ka Belgian-Filipino Kevin Lahousse, kinsa nagpuyo sa Barangay Pajo ang modala sa papel ni Ferdinand Magellan.
Subay niini giawhag sa mayor ang mga tumatan-aw nga magdala ug payong ug mainom nga tubig atol sa reenactment aron malikayan ang insidente sa heatstroke tungod sa taas nga temperatura.
Duna usay gitagana nga mga tent diha sa Liberty Shrine alang sa reenactment aron maprotihian sa kainit sa panahon ang mga tumatan-aw.
Pipila usab ka mga dinapit nga bisita ang gipaabot nga motambong sa kalihukan nga naglakip nila ni Department of Tourism Secretary Maria Christina Frasco, Chairman sa National Historical Commission of the Philippines Emmanuel Calairo ug uban pa. (BANAT NEWS)