Kapolisan mihan-ay na sa seguridad sa “Kadaugan sa Mactan”

CEBU, Philippines — Gihan-ay na sa kapolisan sa Lapu-Lapu City Police Office (LCPO) ang paghatag og seguridad sa tibuok Mactan Shrine sa Barangay Mactan diin himoon ang re-enactment sa ika-502 nga kasaulogan sa “Kadaugan sa Mactan” karong Huwebes Abril 27, 2023.

Si Police Colonel Elmer Lim sa press briefing mitug-an nga dunay ipakatap nga mga polis ug abagan usab pagbantay ang maong lugar sa mga barangay tanod, volunteer group, radio group, mga force multipliers ug uban pa.

Ipakatap usab ang mga traffic enforcer sa City Traffic Management System (CTMS) diha sa kadalanan alang sa pagpatuman sa kahapsay sa mga sakyanan nga molabay sa maong lugar atol sa kalihokan.

Si Mayor Junard “Ahong” Chan sa Dakbayan sa Lapu-lapu nipahibalo nga usa ka Special Non-Working Holiday, sa siyudad ang maong adlaw subay sa pagtimaan sa “Kadaugan sa Mactan”, samtang Special Working Public Holiday tibuok nasud.

Ang mayor nipahinumdum pagbalik sa balaodnon nga nagdeklarar sa maong lugar nga holiday human usab kini gipirmahan panahon sa administrasyon ni kanhi President Rodrigo Roa Duterte niadtong Hunyo 29, 2018.

Gipahibalo usab sa mayor nga karong abril 27, 2023 sirado ang dalan padulong sa Mactan Shrine sugod sa alas singko sa buntag hangtud mahuman ang kalihukan.

Sumala pa ni Chan, tanan mga motorista, gikan ug padulong sa Barangay Punta Engaño, mahimo ra moagi sa Angasil Access Rd sa likod nga bahin sa Mactan Newtown Center. — Rowena D. Capistrano (BANAT NEWS)