Programa kabahin sa stress awareness gimando sa konseho

CEBU, Philippines — Gimandoan karon sa Konseho sa Siyudad sa Sugbo ang Cebu City Health Department nga moumol og mga programa kalabot sa Stress Awareness ug uban pa nga serbisyo nga dunay kalabotan sa maong butang.

Nipasar og resolusyon ang Konseho sa niaging adlaw kalabot niini ug giduso kini ni Konsehal Mary Ann delos Santos.

Sa higayon nga mogama og programa ang CHD kalabot niini himoon dayon ang koordinasyon sa tanang 80 ka mga barangay sa dakbayan.

Sukad niadtong 1992, ang buwan sa Abril kay giisip nga Stress Awareness Month sa International Stress Management Association (ISMA) alang sa paghatag og pahinumdom sa katawhan bahin sa stress nga giisip nga silent killer.

Nasayran dunay ubang tawo nga dili makasugakod sa pag-atubang sa stress sa matag adlaw nga miresulta sa paghambin og sakit sa kasing-kasing, high blood pressure, ug diabetes.

Mao usab kini ang usa sa mga rason sa severe anxiety ug depression.    

Suma pa ni konsehal delos Santos nga tukma lang nga himoon sa dakbayan ilabi na diha sa kabarangayan ang pagsangyaw kabahin sa Stress Awareness ug angayan nga dunay mga kalihukan nga himoon aron maminusan ang epekto niini sa panglawas sa katawhan. (BANAT NEWS)