Kanhi kagawad gipatay

CEBU, Philippines — Nahagba ug nakabsan sa iyang kinabuhi ang usa ka kanhi konsehal sa Barangay Baliwagan sa Lungsod sa Balamban human gipusil sa mga wala pa mailhing mga mamumuno kagahapon sa buntag.

Giila ang biktima nga si Alfonso Buot Jr., gipusil siya sa Sitio Malvar sa nahisgutan nga barangay.

Ang anak sa biktima nga si Grace miasoy naandan na gyud sa iyang amahan nga momata og sayo sa buntag aron mogawas aron mag-exercise ug magkuha sad og lawog para sa ilang binuhi nga rabbit.

Kagahapon sa buntag sakay sa iyang motorsiklo,  ang biktima nagsubay sa dalan sa Sitio Malvar aron mokuha og lawog sa rabbit sa dihang gisikitan kini sa mga mamumuno ug gipusil.

Sigon ni Grace nga gipukaw nalang sila sa ilang silingan labot sa nahitabo sa ilang amahan. Wala sila makatuo nga dunay magkainteres sa kinabuhi sa ilang amahan kay wa man sila’y nadawat nga hulga sa kinabuhi niini.

“Unta mahatagan og hustisya akong Papa. Hopefully soon justice will prevail kay maayong tawo akong amahan maski wala siya’y kwarta if naay moduol sa amoa, moadto sa balay mohatag siya sa iyang makaya ,” sigon ni Grace anak sa biktima.

Ang hepe sa kapulisan sa maong lungsod sa Balamban Police Lt. Col. Glenn Hife miingon nga duna sila’y nakuha nga CCTV footage apan ang nadungog ug nakita kay usa ra ka buto ug ang daling pag-ikyas sa mga mamumuno.

Nahuman sa biktima ang tulo ka termino niini isip konsehal ug nahibaw-an nga nadakpan kini kaniadto sa Provincial Intelligence Branch (PIU) sa Cebu Police Provincial Office (CPPO) pinaagi sa search warrant human nakuhaan og armas ug napasakaan og kasong illegal possession of firearms.

Tanang anggulo ang gisubay sa kapulisan sama sa pagka konsehal niini kaniadto ingon man personal grudges ug lakip sa sutaon sab sa mga tinugyanan sa balaod ang pagka kanhi asset niini sa usa ka law enforcement agency.

“Atong tan-awon ang tanang impormasyon nga gihatag sa atoa sa asawa sa biktima, tukion nato tanan. Dili nato i discount ang posibilidad nga sa iyahang pagka dati niyang konsehal, personal grudge, daghang anggulo ang atong pagatan-awon,” sigon ni Hife. Gimando ni Police Regional Office-7 Director Brigadier General Anthony Aberin sa Provincial Director sa Cebu Police Provincial Office Colonel Rommel Ochave nga mohimo og lawom nga imbestigasyon labot niini.

Si Police Lt. Col. Gerard Ace Pelare, tigpamaba ni Brigadier General Anthony Aberin miklaro nga dili kini alarming ug dili angay ikabalaka sa publiko tungod kay tutokan sa kapolisan ang mga krimen nga naglambigit og kinabuhi.—  IBM ( Banat News )