Garcia nanghinaut nga modaghan ang mga babayeng polis

CEBU, Philippines — Nanghinaot si Gobernador Gwendolyn Garcia nga modaghan pa ang mga babaeng police officers nga mahimong kabahin sa Philippine National Police (PNP).

Atol sa tigom sa gobernadora uban sa bag-ong natudlo nga hepe sa Philippine National Police Regional Training Center 7 nga si Police Col Giovanni Musico niadtong Abril 19, si Garcia nipadangat og “concern” sa gender equality sa PNP human nasayran kang Musico nga lima (5) lang ka mga tinun-an nga babae ang mi enroll sa training center kon itandi sa 40 ka mga lalaki nga enrollees.

Si Garcia nagkanayon nga panahon na aron nga ang kababayen an na sab ang mo level up sa police force.

Segun sa tahu sa Capitol Information Office, si Musico mihisgot sa gihimong kalamboan sa ilang training center ug gikuha ang concerns sa gobernadora alang sa dugang kausaban sa ilang traning facility.

Sa laing bahin nagbansay ang mga sakop sa kapolisan sa lungsod sa Minglanilla labot sa ilang pagtubag og alarma sa tulis.

Matud pa ni Police Major Arieza Otida, hepe sa kapolisan sa Minglanilla nga mas maayo nga sila andam kanunay sa pagtubag sa alarma.

Ang Simultaneous Exercise (SIMEX) gihimo diha sa usa ka pawnshop nga dunay senaryo nga nabiktima sa pagpanulis.

Nagkanayon si Otida nga ila kining gihimo gumikan sa sunod-sunod nga panghitabo nga tulis sa Sugbo ingon man sa ubang lugar.

Gipahimangnoan sab ni Otida ang mga nagdumala og establisamento sa Minglanilla sa ilang mga kuwang nga kahimanan sa pagprotehir sa ilang negusyo.

Kini sama sa mga CCTV camera, walay gwardya ug mga alarm system.

Nanghinaut siya nga tumanon kini sa mga nagduma sa establisamento tungod kay alang ra usab kini sa seguridad sa ilang mga patigayon. Le Phyllis F. Antojado/MEL

Bag-ong building sa Carcar Provincial Hospital gibuksan

Hingpit na nga gibuksan sa Probinsiya sa Sugbo ang bag-ong six storey extension building sa Cebu Provincial Hospital (CPH) sa Carcar.

Moabot sa 120 ka mga hospital beds ang masulod sa maong edipisyo diin matud ni Dr. Prudencio Manubag ang chief of hospital sa CPH-Carcar nga gamiton kini isip isolation rooms, surgery, pedia, internal medicine ug OB-GYN sections.

“Pasalamat ko ni Gov. nga with these two projects, the hemodialysis and the six-storey building, we are given the opportunity to expand and improve our services to our catchment municipalities and cities,” matud ni Manubag sa taho sa Capitol Information Office.

Ang kapitolyo nigasto og P114 million alang sa pagtukod sa maong building nga ang tinguha mao ang pag-atiman og dugang nga pasyente ilabina sa habagatang Sugbo aron dili na mobyahe padulong sa siyudad aron makapatambal.

Tungod sa extension building gikan sa 50-bed capacity sa CPH-Carcar karon ang occupancy rate sa maong tambalanan moabot na sa 200%.

Si Gobernador Gwendolyn Garcia uban ni Carcar Mayor Patricio Barcenas uban sa mga lokal nga opisyal sa Kapitolyo maoy nangulo sa inauguration sa maong edipisyo niadtong Abril 21, 2023.

Ang CPH-Carcar usa ka Level 1 hospital nga otorisado nga mohimo og operasyon diin kasamtangang niapply karon ngadto sa Department of Health alang sa Level II accreditation.

Gibuksan usab sa Kapitolyo ang 15 ka unit sa hemodialysis center didto sa CPH-Carcar alang sa mga pasyente nga kinahanglan mopaubos og dialysis.

Ang CPH-Carcar maoy ikatulo nga hospital sa Probinsya sa Sugbo nga adunay dialysis center. Ang duha mao ang Provincial Hospital sa Balamban ug sa Danao. — MEL ( Banat News )