200 ka polis ipakatap atol sa CVIRAA

CEBU, Philippines — Ang Cebu Police Provincial Office (CPPO) mopakatap og 200 ka police personnel atol sa pagbukas sa Central Visayas Regional Athletic Association (CVIRAA) karong Abril 24, 2023 hangtud nga matapos ang maong kalihokan.

Ang nahisgutang kalihokan ipahigayon diha sa Dakbayan sa Carcar ug nasayran nga molanat kini sulod sa usa ka semana.

Matud ni Police Lieutenant Colonel Mark Gifter Sucalit, Deputy Provincial Director for Operations sa CPPO nga andam na ang ilang security preparation sa CVRAA.

Kabahin sa ilang himuon mao ang pag-secure sa venues, billeting area sa mga moapil sa CVIRAA ug apil usab ang mga tumatan-aw.

Si Sucalit nagkanayon nga dili lang ang Dakbayan sa Carcar ang padad-an og police personnel sa CPPO lakip na ang ubang dapit sa Probinsiya sa Sugbo nga adunay mga kalihokan alang sa CVIRAA sama sa Siyudad sa Naga ug Lungsod sa San Fernando.

Nangayo og augmentation ang CPPO sa Regional Mobile Force Battalion (RMFB)-7 ug aduna usab sila’y support force nga gikuha sa provincial headquarters aron adunay mga polis nga ipakatap sa mga dapit nga kinahanglang padad-an og polis.

Nunot niini, nibiyahe na kagahapon sa buntag paingon sa ilang billeting area diha sa Barangay Sangat, Lungsod sa San Fernando ang delegado sa Dakbayan sa Talisay alang sa CVIRAA.

Ang kalihokan gisugdan sa Santos nga Misa dayon ang pagbendisyon sa kinatibuk-ang delegado. Niabot ngadto sa 804 ang delegado sa Dakbayan sa Talisay diin sa maong gidaghanon 519 niini ang mga atleta samtang ang sobra mao ang coaches ug uban pa nga personnel sa Department of Education (DepEd) sa siyudad.

Si Dr. Arden Monisit, schools division superintendent maoy nangulo sa send-off ceremony uban nila ni Mayor Gerald Anthony “Samsam” Gulla, Jr.s ug mga sakop sa konseho pinangulohan ni Bise Mayor Richard Francis “Choy” Aznar.  - Gabriel C. Bonjoc, BDB (BANATNEWS)