Kapolisan sa Lapu-Lapu nisuporta sa pagpabalik sa Tokhang
CEBU, Philippines — Gisuportahan sa kapolisan sa Lapu-Lapu City Police Office (LCPO) ang sugyot ni Senador Ronald “Bato” dela Rosa nga ibalik ang Toktok Hangyo (Tokhang) sa mga nalambigit sa ilegal nga drugas.
Matud ni Police Colonel Elmer Lim, direktor sa LLCPO nga maayo ang maong tinguha nga pagbalik sa Tokhang tungod kay dako kini og ikatabang sa kampaniya sa pagpakgang sa ilegal nga kalihokan. Atol sa press briefing nga gipahigayon si Lim nagkanayon kini nga alang kaniya dili lang ang mga nalambigit sa ilegal nga kalihokan ang tokhangon apil ang tanang nailhan nga badlongon sa katilngban.
Matud usab ni Lim nga apil sa tokhangon kadtong mga adunay kaso sa pagpangawat o paghupot og ilegal nga armas ang malakip.
Ang mga ma-Tokhang tapokon kini ug pahimangnoan nga kon adunay mga daotang panghtabo sa ilang tagsa-tagsa ka mga lugar sila ang dali nga mahimong katahapan.
Giklaro ni Lim nga sa pagahimuong pagtokhang ilang mahibaw-an ang naghimo sa krimen tungod kay magbaton man og listahan ang kapolisan sa tanang badlongon sa katilingban sa ilang tagsa-tagsa ka mga lugar. Sa laing bahin, nasikop ang usa ka senior citizen atol sa buy bust operation nga gipahigayon sa kapolisan diha sa Barangay Canduman, Siyudad sa Mandaue sa niaging gabii.
Si Police Major Manuel Cabanlit, hepe sa Presinto 6 sa Mandaue City Police Office (MCPO) niila sa suspetsado nga si Marcelo Mabatid Padilla, 67-anyos, taga Barangay Mabolo, Siyudad sa Sugbo. Nasakmit sa kapolisan gikan kang Padilla ang walo ka paketeng shabu nga nagkantidad og P2,000 ug P200 nga buy bust money.
Ang suspetsado nihimakak nga siya ang tag-iya sa maong ginadiling drugas ug matud niini nga gisugo lang siya sa pagdala diha sa nahisgutang dapit sa Siyudad sa Mandaue. – BDB (BANATNEWS)
- Latest
