Nasunogan sa Mambaling  nangayo og tabang sa publiko

CEBU, Philippines — Mga nasunogan sa Sitio Manga, San Roque Barangay Mambaling sa Cebu City nanawagan sa publiko nunot sa panginahanglan nila sa mga sapot nga magamit, pagkaon ug kagamitan human kadaghanan kanila walay napunit o nabitbit tungod sa kakusog ug kakalit sa pag-ulbo sa sunog sa ilang dapit niadtong adlaw nga Miyerkules. Si Sharmaine Buen Maloloy-on, ang SK Chairman sa Mambaling wala nakalikay sa maong trahedya human ang ilang panimay ang nalakip sa kaugdaw.

Sumala pa ni Maloloy-on, ugdaw tanan nilang pangandoy, impas tanan nilang paningkamot ug wala gayud bisan usa sa ilang mga gamit ang nasalbar sa iyang pamilya sama sab sa nahitabo sa ilang mga silingan nga tapot-lawas ray nadala.

Si Maloloy-on nanawagan sa tanang ahensya sa gobiyerno ug mga NGO, ug bisan unsa nga klase nga tabang para sa Sitio Mangga, para sa tanan nasunogan kay ila kini dawaton.

Sa inisyal nga talaan sa Department of Social Welfare and Service adunay 76 ka mga panimalay nga apektado ug 69 niini ang hingpit nga naugdaw samtang dunay pito nga nakan-an sa kalayo.

Niabot usab ngadto sa 138 ka mga pamilya o 486 ka individuals ang apektado sa pag-ulbo sa maong sunog.

Samtang sa Sitio Tabok, Barangay Pit-os, walo ka balay ang naugdaw, 10 ka pamilya ang naapektahan.

Ang DSWS padayon pa nihimo og validation sa sunog sa Mambaling, samtang sa pit-os mao na kadto ang ilang final nga listahan.

Kung mahinumduman duha ka sunog niulbo sa Dakbayan sa Sugbo, adlaw nga Miyerkules.

Sa laing bahin, lima ka mga lungsod sa probinsya sa Sugbu ang plano nga mabutangan og kaugalingong fire stations sumala pa sa bag-ong nilingkod nga regional director sa Bureau of Fire Protection (BFP-7) ng si Fire Chief Supt. Roberto Genave.

Atol sa iyang courtesy call kang Gobernador Gwendolyn Garcia didto sa Kapitolyo, si Genave nagkanayon nga butangan nila og fire stations ang Alcoy, Borbon, Ronda, Santander ug Tabogon nga wala pa hangtud karon kaugalingong fire station ug nagsalig lang sa mga bombero sa mga silingang kalungsoran.

Ang BFP-7 ug ang LGU mamahimong mosulod og usufruct agreement aron nga mapatuman ang pagtukod sa maong fire station kon diin ang LGU maoy mogahin og luna ug ang BFP maoy motukod sa fire station. Pinaagi niini mapaspasan ang pagtukod sa maong mga stations sanglit dili na kinahanglan pa nga ang BPF maoy mangita og luna.

Si Garcia nipahibalo ngadto sa bag-ong director sa BFP-7 nga adunay bag-ong gipasar nga ordinansa nga nagmando sa mga national government agencies sa pagkonsulta sa Kapitolyo sa mga ipatuman nga programa ug proyekto niini sa Probinsya sa Sugbo. — Le Phyllis F. Antojado (BANAT NEWS)