CEBU, Philippines — Gipahibalo sa Visayan Electric nga mahimo na nga mo-apply ang ilang mga konsumidor sa Lifeline Rate Subsidy nga alang sa beneficiaries sa 4Ps o miyembro sa marginalized sector ug alang sa mga nagbinuwan nga konsumo sa kuryente nga wala molapas sa 100kWh.
Nasayran nga ang maong sestema nalatid sa probisyon sa Akta Republika 10150 kun “Electric Power Industry Reform Act of 2001” nga naghatag og subsidy sa bayranan sa kuryente alang sa mga kwalipikadong konsumidor nga adunay binuwan nga konsumo sa kuryente nga wala molapas sa 100kWh.
Giaprobahan kaniadto sa gobiyerno ang Akta Republika 11552 kun “Act Extending and Enhancing the Implementation of the Lifeline Rate” nga nibungat nga gawas sa rekisito nga 100kWh paubos nga binuwang konsumo sa kuryente ang mga konsumidor nga maka benepisyo sa Lifeline Subsidy mao lang ang beneficiaries sa 4Ps ug ang ubang mga miyembro sa marginalized sector nga ang binuwang kita o income anaa sa ubos sa poverty threshold nga gideklara sa gobiyerno.
Ang bag-ong balaod nipataas usab kini sa validity sa subsidy ngadto sa 50 ka tuig. Ang pag-umol sa Implementing Rules and Regulations naggikan sa hiniusang ideya sa Energy Regulatory Commission (ERC), Department of Energy (DOE) ug Department of Social Welfare and Development (DSWD).
Nagikan sa DSWD ug DOE ang listahan sa beneficiaries sa 4Ps nga gihatag ngadto sa distribution utilities sama sa Visayan Electric aron mao ang gamiton sa pag-validate kong kwalipikado ba ang konsumidor nga ni-apply aron makakuha sa Lifeline Subsidy.
Sa mga gustong mo-apply sa maong programa kinahanglanlan nga mosumiter og application form nga makuha sa mga Visayan Electric Service Center, mahimo usab nga makapangayo og online copy diha sa Visayan Electric Facebook page, labing bag-o nga bill sa kuryente, ug valid government-issued ID.
Alang sa dili beneficiaries sa 4Ps apan miyembro sa marginalized sector gawas sa mga rekisitos nga nahisgotan sa ibabaw magkinahanglan usab og certification gikan sa lokal nga Social Welfare Development Officer (SWDO) nga magpamatuod nga ang iyang panimalay anaa sa ubos sa poverty threshold.
Mag-agi og balidasyon sa Visayan Electric ang tanang mga aplikasyon ug mga dokumento nga isumiter sa mga mo-apply. Ang mga aplikante nga wala sa listahan sa 4Ps nga gikan sa DOE/DSWD ug kadtong mga dili makasumiter sa kompleto nga rekisitos dili mahatagan sa maong benepisyo.
Ang beneficiaries nga molapas sa 100kWh matag buwan nga konsumo sa kuryente dili maka-avail sa benepisyo sa mga buwan nga nilapas sa iyang konsumo.
Ang mga miyembro sa 4Ps maka-avail sa benepisyo hangtud nga anaa siya sa opisyal nga listahan sa 4Ps beneficiaries samtang ang mga dili miyembro sa 4Ps nga makapasar sa ilang aplikasyon para sa Lifeline Subsidy kinahanglang mo- renew sa ilang aplikasyon matag tulo ka tuig. (BANAT NEWS)