CEBU, Philippines — Ang Bohol Provincial Government nga gipangulohan ni Governor Erico Aristotle Aumentado ug Panglao Association of Dive Operator President Ivy Kong lakip usab ang Department of Tourism and Dive 7 nagkahiusa alang sa 1st Bohol Loop Dive Expo 2023 uban sa tema, Be Part of My World: Defying Limits Underwater Discoveries.
Tumong sa kalihukan mao ang pagbuhi pagbalik sa Turismo sa Probinsya sa Bohol, ilabi na kay sila abunda sa Marine Life ug maanindot nga kadagatan.
Subay niini dunay mga bag-ong dive sites nga nadiskubre gikan sa 12 ka municipalities ug mag promote sa Probinsya isip premier diving destination sa Pilipinas.
Gihangop ug gipahalipayan usab ni Gov. Aumentado ang mga private stakeholders nga maoy katambayayong nila sa maong kalihukan.
Sumala pa sa Gobernador, ang maong unang kasinatian nila magkabig unya ug mga turista ilabi na sa mahiligon sa diving.
Gipasalig niya nga andam motabang ang iyang pamunuan ug mohatag sa suporta sa mga kalihukan nga makapalambo sa Tourism Industry sa Probinsya.
Gitug-an ni Aumentado, ang maong kalihukan magbukas kini sa global arena ilabi na sa mga diver nga gikan sa gawas sa nasud nga mao nay mopaambit sa ilang kasinatian.
Ang mga Lungsod nga naapil sa 1st Bohol Loop Dive Expo 2023 mahinangpon ug mapasalamaton tungod kay mapaambit na usab nila ang ilang mga tourist destination nga wala pa makita o maila sa katawhan.
Ang maong kalihukan gitambongan sa dili mominos 15 ka mga scuba divers sa China, Taiwan, Korea ug sa Pilipinas. (BANAT NEWS)