Mga sakyanan ug motorsiklo nga na-impound isubasta

CEBU, Philippines —  Napasar sa unang pagbasa sa konseho sa Dakbayan sa Talisay ang pag-amendar sa ordinansa kalabot sa pagsubasta sa mga na-impound nga sakyanan ug motorsiklo nga dugay na nga wala gitagad sa mga tag-iya.

Si Konsehal Danny Caballero, chairman sa committee on traffic maoy nangamahan sa ordinansa paglakip sa ordinansa pag-umol og auction committee aron mahan-ay ang mga dokumento nga kinahanglanon.

Tumong nila mao ang paghawan sa compound sa buhatan sa command center diin nagdasok na ang mga sakyanan ug motorsiklo nga wala na gitagad sa mga tag-iya.

Matud pa ni Caballero nga adunay daghang plano ang mayor sa lugar apan dili una mapatuman tungod kay walay kabalhinan sa mga na-impound nga sakyanan ug motorsiklo.

Ang ipaubos sa auction mao kadtong mga motorsiklo ug sakyanan nga na-impound nga niabot na sa lima ka tuig o sobra nga wala na atimana sa mga tag-iya niini.

Gani ang City of Talisay-Traffic Operation Development Authority (CT-TODA) nihatag og tulo ka higayon sa pagpanawagan sa mga tag-iya apan menos ra ang nituman niini.

Kaniadto ubos sa ordinansa, anaa sa gahum sa kapolisan ang pagrekomendar kong unsa nga sakyanan ug motor ang isubasta apan sa bag-o unya nga ordinansa anaa na kini sa mga kamot sa CT-TODA aron paspas ang pagproseso. — BDB (BANATNEWS)