Ma-demolis sa kasapaan wa nay financial assistance

CEBU, Philippines — Mamahimong benepisaryo sa housing program sa kagamhanan sa Siyudad sa Sugbo ang mga maapektohan sa mga clearing  operations sa pagbawi sa three-meter easement sa kasapaan apan wala na silay madawat nga financial assistance.

Kini maoy pagklaro sa co-chairman Task Force Gubat sa Baha sa Dakbayan nga si Atty . Gerry Carillo aron magamit pa ang pundo sa mas nag-unang mga panginahanglanon sa siyudad.

Matud pa ni Carillo nga gipahunong na ni Mayor Michael Rama ang paghatag og financial assistance alang sa mga apektado sa clearing operations human duna sila'y nabantayan nga ang uban nagtukod napud og panimalay sa laing area nga nakalapas gihapon sa mga lagda.

Aron masiguro ug hapsay ang tanan ug walay magabusar himuon nalang silang benepisaryo sa housing project sa siyudad.

Dili hinuon matino ni Carillo kun pila ka pamilya ang nahatagan kaniadto og financial assistance.

Sa nagpadayon nga profiling ug tagging , ang mga maapektohan sa pagbawi sa three-meter easement  sa walo ka dagkong sapa sa dakbayan moabot na og 6,218 ka estraktura ang naigo ug kapin sa 20,000 ka pamilya ang naapektahan.

Alang kaniya nga ang labing importante karong panahona mao nga giproseso na ang housing program sa dakbayan ug una nabalita dinhi sa Banat News kagahapon nga sugdan na sa dilo madugay ang  bidding alang pagahimoon nga mga temporary shelter.

Ang laing co-chariman sa maong task force nga si Atty. Jerone Castillo kay nitataw nga gitawag kini og temporary shelter kay alang kini  sa mga  "walang-wala." 

Ipaubos ang mga benepisaryo og nagkadaiyang livelihood skills training ug sa higayon nga aduna na kini saktong panginabuhian , mahimo na sila nga mapunta sa laing hugna sa pagpuyo ,sama sa pag-avail sa abangan o ba kaha ang barato nga data-data nga housing program.

Apan kadtong mga pamilya nga dunay  dakong income , gitambagan kini ni sa Castillo nga adto nalang mo-avail sa mga programa sa PAG-IBIG.

Alang kaniya , hatagan og prayoridad sa housing program sa Dakbayan sa Sugbo mao ang   poorest of the poor .

Nasuta sa gihimong ebalwasyon  sa mga namuyo nga doul sa sapa , aduna kini mga dagkong income. (BANATNEWS)