Dugang  programa alang sa kabatan-onan umolon  sa CCYDC

CEBU, Philippines — Moumol og dugang programa ang Cebu City Youth Development Commission (CCYDC) alang sa pag-edukar sa kabatan-onan aron malikay sa Teenage Pregnancy ug HIV.

Suma pa ni Paolo Martin Saberon executive director sa CCYDC nga kauban nila sa maong programa mao ang Cebu City Health Department ug Commission on Population.

Lakip sa himoon mao ang Programmatic Youth Development diin magbansay-bansay sila sa kabatan-onan aron mahimong facilitators ug educators sa pagsangyaw aron sa paglikay sa HIV ug sayo nga pagkamabdos.

Laing programa mao Parent-Teen Talk nga magpalapad sa komunikasyon sa mga hingtungdan aron hisgotan ang nagkadaiyang concerns. Pipila sa ilang mga partisipante langkoban sa kabatan-onan ug ginikanan.

Matud pa ni Saberon nga kasagaran sa kabatan-onan karon expose kaayo sa bisan unsa nga butang ug dako ang ikatabang sa mga ginikanan sa paghatag og giya sa kabatan-onan nga dili magpalabi sa mga butang nga maghatag kanila og problema.

Sa National Demographic and Health Survey sa Philippine Statistic Authority (PSA), 5.4 percent o 5, 531 ka mga babaye sa nasud nga nag-edad og 15 ngadto 19 ang         namabdos.

Kalabot usab sa kaso sa HIV, base sa report sa Department of Health Central Visayas, nakatala kini og HIV infections nga niabot sa 8,407 (as of May 2022), o 4,993 (59%) nagikan sa Dakbayan sa Sugbo. (BANATNEWS)