Liboan ang nitambong sa Sugat Kabanhawan sa Minglanilla

CEBU,  Philippines — Gibana-banang niabot ngadto sa 26 mil ka tawo ang nitambong sa Sugat Kabanhawan sa Lungsod sa Minglanilla kagahapon.

Kini gibutyag ni Police Major Arieza Otida, hepe sa kapolisan sa Lungsod.

Matud ni Otida nga alas 6:30 sa gabii niadtong Sabado gisugdan na nila sa pagbantay ang palibot sa sport’s oval.

Gibutyag ni Otida nga kapin sa 200 ang ilang pwersa ang gipakatap nga maoy nihatag og seguridad sa kalihokan.

Si Otida nipadayag sa iyang kahangop nga malamposon ang kalihokan diin walay kakulian nga nahitabo bisan sa kadaghan sa mga tawo.

Samtang generally peaceful usab sa Dakbayan sa Talisay ilabi na sa nagkadaiyang mga simbahan sa siyudad.

Si Police Lieutenant Colonel Randy Caballes, hepe sa kapolisan sa siyudad wala mooumpiyansa diin nangunay kini sa pagsuroy diha sa nagkalain-laing simbahan sa Dakbayan sa Talisay. Subay niini, ang mga sugat sa mga nagkadaiyang parokya sa Archdiocese of Cebu malamposon ug malinawon nga napahigayon.

Nasayran nga adunay mga nagkadaiyang nga kalihokan sa pagpahigayon sa ilang sugat sayo sa buntag kagahapon.

Sa Cebu Metropolitan Cathedral, nangulo si Archbishop Jose Palma sa solemn mass sa Easter uban nila ni Cebu Auxiliary Bishop-Emeritus Antonio Rañola, mga kaparian sa Cathedral ug private secretaries niini.

Si Padre Mhar Vincent Balili, parish priest sa Mary Help of Christian Buhisan nibutyag nga aduna usab sila’y gihimo nga sugat sa adlaw sa Pasko sa Pagkabanhaw sa Ginoo diin naghatag kini og paglaum sa mga nasinating kalisod ug kalipay sa mga kaguol. - Rowena D. Capistrano (BANAT NEWS)