CEBU, Philippines — Gipahigayon kagahapon sa buntag diha sa Cebu Metropolitan Cathedral ang Chrism Mass and Renewal of Commitment to Priestly Service.
Ang maong kalihokan gitambongan kini sa gatusan ka pari sa Archdiocese of Cebu nga gipanguloan ni Archbishop Jose Palma.
Ang nahisgutang kalihokan mao ang pagbendita ug pagpanalangin sa mga lana nga gamiton sa bunyag, masakiton, konpirma ug uban pa.
Gawas niini, magbag-o usab sa ilang mga saad ang mga kaparian nga diocesan ug religious nga congregation.
Nasayran nga himuon unta panahon sa Huwebes Santo ang nahisgutang kalihokan apan tungod sa kadako sa Archdiocese of Cebu hinungdan nga gipahigayon kini kagahapon sa dili pa ang Semana Santa aron kadtong mga kaparian nga gikan sa lagyo nga lugar ang makapauli pa sa ilang tagsa-tagsa ka parokya ug dili kini nila mabiyaan.
Karong tuiga human gipaloagan ang mga restriction daghan na sa mga kaparian nga diocesan ug religious ang madasigon nga niapil ug nitambong sa maong kalihokan.
Si Palma nipadayag sa iyang kalipay nga nalatasan na ang COVID-19 ug nakita niya ang physical presence sa mga kaparian ilabi na kadtong mga gikan sa lagyong dapit nga tuyo nga niapil sa kalihokan kagahapon diin nagpakita kini sa kahiusahan.
Matud ni Palma nga pinaagi sa chrism mass gidihugan ang tanan diin nagpakita kini sa gugma sa Dios ngadto sa katawhan ug ang tanan managsama nga importante sa usag-usa.
Dugang ni Palma nga tanang mga tawo adunay lain-lain gasa ug usa kini ka pribilihiyo nga angayang ipaambit ngadto sa isig katawo. (BANATNEWS)