CEBU, Philippines — Ipadayon sa lokal nga kagamhanan sa Dakbayan sa Mandaue ang plano niini nga pagtukod og government center sa giabandonar nga Cebu International Convention Center.
Kini maoy nasabotan ni Gobernador Gwendolyn Garcia ug Mandaue City Mayor Jonas Cortes atol sa ilang tigom nga gisaksihan sa taga Commission on Audit (COA)-7.
Sa pagkakaron, naghulat pa ang Kapitolyo ug ang Mandaue sa reappraisal sa COA sa maong kabtangan.
Apan ang kagamhanan sa Dakbayan sa Mandaue gusto nga ipadayon ang plano niini nga government center.
Niadtong tuig 2017, ang Probinsiya sa Sugbo ubos sa administrasyon sa kanhi gobernador ug karon Bise Gobernador Hilario Davide III nibaligya sa CICC ngadto sa Dakbayan sa Mandaue og P300 milyones.
Apan dihang nilingkod si Garcia og balik isip gobernador nasayran niini nga ang nahimong kasabotan wala moagi sa pagtugot sa COA.
Ang naguba nga CICC gitukod aron mo host sa 2007 ASEAN Summit ug related summit.
Apan niadtong tuig 2013 naguba kini gumikan sa 7.2 magnitude nga linog ug sa bagyong Yolanda.
Sukad niadto wala na magamit ang maong building ug karon kasamtangang gipuy-an sa mga informal settler sa Mandaue. (BANAT NEWS)