CEBU, Philippines — Mas migrabe karon ang nahipos nga gidaghanon sa mga basura sa gihimong city wide cleanup drive sa dakbayan sa Sugbu niadtong adlaw nga Sabado kun itandi sa kataposang nagpahigayon niini sa miaging tuig.
Niabot ngadto sa 97 metriko tonelada ang nakolekta nga basura sa Department of Public Services (DPS) atol sa gipahigayong cleanup drive nga gipasiugdahan sa kagamhanan sa Siyudad sa Sugbo niadtong Sabado.
Suma pa ni Reymar Hijara, special assistant ni Mayor Michael Rama sa environmental concerns , nisalmot sa maong kalihokan ang nagkadaiyang volunteers nga nagagikan sa mga buhatan sa city hall , barangay, organisasyon , mga pribadong kompanya , civic ug religious groups ug uban pa.
Mapasalamaton ang kagamhanan sa tanang nisuporta sa maong programa. Giingong dul-an sa 5,000 ka volunteers ang nitabang niini.
Gawas sa DPS, gipagamit usab sa City Engineering Office, Department of General Services, ug ubang departamento nga mga ekipo ug dumptruck sa pagkarga sa mga basura.
Gibutyag ni Hijara dinhi sa Banat News nga 40% sa nahipos nga basura kay mga plastik. Samtang ang 45% kay biodegradable, ug 15 % usab ang residuals.
Apan kun basihan ang gidaghanon sa mga nakolekta karong basura, mas midaghan kini kun itandi sa kataposang kwarter sa tuig 2022 nga gipahigayon ang susamang programa nga giingong miabot lang og 25 metriko tonelada.
Daw walay kalamboang nahitabo sa nakalabay nga mga buwan bisan pa sa pangangkon sa mga hingtungdang ahensiya nga sila nangusog sa ilang mga kampanya pagpanalipod sa kalikopan nga gihimo sa siyudad pinaagi sa paghipos sa mga basura. Naglakip sa mga gipanghimo sa siyudad ang pagbutang og mga bio-fences sa kasapaan aron masawod ang mga basura ug dili maanod padung sa kadagatan, estriktong paggukod sa mga tawong magpataka og labay og basura ug ingon man ang matud pa pulong-pulong ngadto sa mga barangay bahin sa hustong paghipos sa basura.
Subay sa Waste Management Act, kinahanglang bahigon daan ang basura gikan sa malata ug di malata ug ang local government units apil na ang mga barangay maoy gitahasan nga mopatuman niini.
Ang maong Citywide Cleanup Challenge maoy una karong tuiga agi og pag-abag sa kagamhanan alang sa lapad nga pagprotektar sa kalikopan.
Ang naandan nga Cleanup Drive kay pinasubay sa City Ordinance 1988. Tipik usab kini sa mga programa aron malikayan ang mga pagbaha sa dakbayan.—(BANAT NEWS)