10 ka insidente sa sunog natala sulod karong buwana
CEBU, Philippines — Niabot ngadto sa napulo ka insidente sa sunog ang natala sa Cebu City Fire gikan sa Marso 1 hangtud sa 10, 2023.
Kini ang gibutyag sa tigpabama sa Cebu City Fire Department Senior Fire Officer 2 Wendell Villanueva.
Matud ni Villanueva nga kasagaran nga nasunog residential houses ug adunay sakyanan diin niabot ngadto sa P8,676,750.00 ang kinatibuk-ang danyos sa maong mga insidente.
Gibutyag ni Villanueva nga kasagarang hinungdan sa sunog mao ang electrical ug sa ulahing talaan diha sa may Aznar Road sa Sitio San Juan Barangay Sambag 2, alas 12:10 sa hapon naglambigit og sakyanan apan pag-abot sa kabomberohan fire out na kini.
Nikabat ngadto sa P80 mil ang danyos sa maong sunog.
Ang kabomberohan padayong niawhag sa katawhan nga magmabinatayon kanunay ug susihon ang ilang mga linya sa kuryente aron malikayan ang sunog.
Sa nilabay’ng tuig adunay 224 ka sunog gikan sa buwan sa Enero ngadto sa Disyembre ug nikabat ngadto sa P506,614,700 ang kinatibuk-ang danyos. (BANATNEWS)
- Latest
